beat sterchi

Kornhaus Bern, 10. September 2009


ATU PRIX

Ändlech redt me meh drvo.
Aber was heisst eigentlech Zersiedelung?
Nach Duden heisst das:
Die Natur durch Siedlungen zerstören.
U wie seit me Zersiedelung uf Bärndütsch?

Zersiedelung uf Bärndütsch heisst:

nid lose nid luege
nid linggs
und nid rächts
à tout prix
nid über d Nase us luege

Zersiedelung uf Bärndütsch heisst:

deale u profile
iizone u umzone
dass me à tout prix
cha im Grüene wohne

Zersiedelung uf Bärndütsch heisst:

ds land ufschrysse
überau ds Land ufsschrysse
d Wyse u d Matte
à tout prix
ds Hudle u ds Fätze zerrysse

Zersiedelung uf Bärndütsch heisst:

dr Waud abhoue
überau Strässli ine houe
ds Land vrsoue
à tout prix
boue boue boue boue

JA, das heisst Zersiedelung uf Bärndütsch.

****

No wägem Umbou

Bym Umbou
im Aabou
vom Houptbou
vom Museumsbou
gits im Überbou
e Rückschtou
bym Gedankebou
u anstatt dr Troumbou
gyts äuä
ke Nöibou
aber en Usbou
vom Autbou
u dür das en Abbou
vom Vorbou
u bym Ufbou
vom Ungerbau
im Lagerabou
u nachem Iibou
vom Bürobou
ä chlyne Steueabou

******

Agglo

I dr Schtadt isch i dr Schtadt u i dr Agglo isch i dr Agglo, das isch scho immer so gsy, drum gyts i dr Schtadt in d Schtedter u i dr Aglo us d Agglomeraner und drzwüsche gyts d Schtrasse für d Chäre.
Vo dr Schtadt us gseh isches aber überhoupt nid eifach säubvrständlech, dass itz i dr Agglo so viu Agglomeraner meine, sie müessi immer use us dere Agglo u mit ihrne Agglochäre zu üs Schtedter inne i d Schtadt cho, we doch d Schtadt üsi Schtadt isch u mir Schtedter ja o nid eifach mit üsne Schtadtchäre i ihri Agglo use frese, u dert so tüä, wie we das itz o no üsi Schtadt wär u nid ihri Agglo u wie we mir Schtedter o eifach nume no Agglomeraner us der Agglo mit Agglochäre wäre u nid Schtedter mit Schtadtchäre i dr Schtadt, wo auii Agglomeraner us dr Agglo mit ihrne Agglochäre drin umfresse, wie we das o scho ihri Agglo wär u nüm d Schtadt vo üs Schtedter.
Drum söüä diä Agglomeraner us dr Agglo mit ihrne Agglochäre bi üs Schtedter i üsere Schtadt itz nid eifach so tuä, wie we üsi Schtadt o i ihrer Agglo wäre u mir i üser Stadt o nüme angers aus Schtedter ohni Schtadt i dr Agglo vo dene Agglomeraner mit ihrne Agglochäre.
Auso süsch we die mit ihrne Agglochäre us üsere Schtadt o no wei ä Aggloschtadt mache, de göh mir Schteder de o use us dere Aggloschtadt use i d Agglo vo de Agglomeraner mit de Agglochäre u mache mit üsne Stadtchäre us ihrer Agglo o no ä Schtadtagglo wie die i ihrer Agglo noch nie hey ä Schtadtagglo gseh. Aber de agglo. De sofort agglo. Süsch potz agglo noeinisch. Heitereagglo! Das isch doch agglo, oder?


© BS



< bersicht