beat sterchi

Outo

si si muff
wägem Puff
a dr Chrüzig

die vo hinge
horne
gäge die
da vorne

umeschta
tuet weh
o im BMW

mache mr
doch schnäu
es Tunäu
gäu

hani das satt
das Chaos
i dr Innestadt

es geit nid schnäuer
d Morau
isch im Chäuer

die Ample
isch wie tot
chum isch grüen
chunnt scho wyder
Gäub u Rot

niene chasch passiere
nächär muesch
wie ne Tubu pressiere

mache mr
doch schnäu
es Tunäu
gäu

o uf dr Outobahn
kes Glück
scho vor dr Uffahrt es
Drück

geit das wyder zäch
s wyt
ds gsesch
nume Bläch

U die Bouschteue!
Die Bouschteue!
Jö die Bouscheue!
Überau Bouscthteue!

mache mr
doch schnäu
es Tunäu
gäu

u itz scho wyder
im Schtou
u deheime
wartet d Frou

mache mr
doch schnäu
es Tunäu
gäu

öb gäge Weschte
oder gäge Oschte
überau
tüe sie moschte

o gäge Norde
nume Horde
vo schwäre Schlitte
wo müesse schtah
u nid chöi wytergah 

o vorem Gotthard
geit aus chrum
dr Stress
hout di fasch um

es wird
nume gschnagget
u zagget
u gragget

mache mr
doch schnäu
es Tunnäu
no es Tunäu gäu
gäu
eifach
schnäu
es Tunäu
gäu

mache
mr eifach
mache mr eifach
no schnäu es Tunäu
mache mr schnäu es Tunäu
eifach schnäu es Tunäu
schnäu es Tunäu
es Tunäu
gäu




< bersicht